Көбелектің гүл бағында!

«Көбелектің гүл бағында!» тақырыптық мерекесінің сценариі.

Тәрбиеші: Балалар, мен сендерге жұмбақ жасырайын,шешуін табасыңдар ма?
Ендеше,тыңдаңдар,
Қойның толы жеміске,
Көк майсалы еңісте.
Көбелек қуып ойнайтын,
Бұл қай мезгіл деп ойлайсың?
Балалар: жаз мезгілі.
Тәрбиеші: жаз ең жылы мезгіл,жазда біз не істейміз?
Балалар: жеңіл киінеміз,суға түсеміз,гүл тереміз,таза ауада демаламыз.
Тәрбиеші: иә,дұрыс айтасыңдар,жаз керемет мезгіл,қараңдаршы,бүгін күн қандай тамаша! Қане,көгілдір аспанға қарайықшы,не көріп тұрсыңдар?
Балалар күнді бақылайтын көзілдіріктерімен күнге қарайды: күнді.
Тәрбиеші: Иә,бұл Ару Күн,бізге әсіресе,жаз мезгілінде ерекше шуағын төгеді,бойымызды қыздырып жылу береді,жүрегімізге қуаныш сыйлайды.Балалар жайдары жаз туралы кім тақпақ айтып береді?
Алена:
Дөңгеленіп төбеден,
Сәулесін күн төгеді.
Жарқын жаздың не деген,
Жасыл түсі көп еді.
Ясмин:
Ой,балалар,балалар,
Жылы-жылы жел соқты,
Жылғалардан су ақты,
Қаңқыл-қаңқыл қаз кепті,
Жер қарайып,жаз кепті.
Желкілдейді көк майса,
Құлпырады кең дала!
Әлфараби:
Жайқалып жапырақ,
Құлпырып қызғалдақ.
Тұратын көз тартып,
Жаз келді күн шуақ.
Шахрьяр:
Жаз жайдары,алақай,
Жатыр жайнап даламыз.
Жүр, кәнеки,балақай,
Шомылуға барамыз.
Тасыр-тұсыр,найзағай ойнаған дауыс шығады.
Тәрбиеші: ой,балалар,естисіңдер ме?Бұл не болды екен?
Жүгіріп бұлт кіреді.
Балалар: бұл бұлт қой.(Саусақ жаттығуын жасайды.)
Бұлт қабағын түйіп-ап,
Бүркеп алды аспанды.
Тырс-тырс,тырс тырсылдап,
Жаңбыр жауа бастады.
Бұлт:
Мен-бұлтпын,бұлтпын,
Жаңбыр болып тамамын.
Жер дүниені құлпыртып,
Жауар нұр-құтпын.
Тәрбиеші: иә,балалар,арасында жаңбыр жауып тұрған да дұрыс.Жер бетіндегі барлық өсімдіктер жаңбыр суынан нәр алады.Біздің Диастың да бұлтқа айтары бар.
Диас:
Жау-жау жаңбыр тағы да,
Дала,тауға көрік бер.
Менің еккен бағымда,
Өссін алуан гүлдер.
Тәрбиеші:бұлт, біз сенімен ойын ойнағымыз келеді.
Бұлт: жарайды.
Ойын: «Күн мен жаңбыр»
Бұлт: сау болыңдар, балалар,тағы келем сендерге,кездескенше!
Шеңберді бір айналып кетеді.
Тәрбиеші: балалар,жаңбырдан кейін аспанда не пайда болатын еді?
Балалар: кемпірқосақ.
Тәрбиеші: кемпірқосақ қандай түсті болатын еді?
Балалар: түрлі-түсті.
Тәрбиеші: балалар менде шатасып кеткен кемпірқосақтың жолақтары бар,әдемілеп құрап қойсақ жарасар еді.
Ойын: «Кемпірқосақты құрастыр»
Тәрбиеші: біреу жылай ма,балалар,тыңдаңдаршы?!(жыламсыраған дыбыс шығады)
Осы кезде Дымбілмес келеді: сәлеметсіңдер ме,балалар,менің атым –Дымбілмес,сендерге бірнәрсе көрсетуге келдім,неге біртүрлі болып тұрсыңдар бәрің?
Тәрбиеші: сәлемет пе,Дымбілмес,естисің бе біреу жылайтын сияқты.
Дымбілмес: а-аа ол-көбелек қой.Өзі сондай әдемі!Мен оны ұстап алып,шыны ыдысқа қамап қойғам!Енді күнде оған қарап,сүйсініп қарап отырам!Сендерге де көрсетем!
Тәрбиеші: балалар,Дымбілместің ісі дұрыс па?
Балалар:жоқ.
Тәрбиеші: Дымбілмес сен біліп жүр,көбелек ыдыстың ішінде тұншығып қалады.Көбелек-ешқандай зияны жоқ,жер бетіне,гүлдерге көрік беріп ұшып-қонып жүретін жәндік.Ол-әдемілігімен,нәзіктігімен көзге қуаныш сыйлайды,сондықтан оны жібер,обал болады.
Дымбілмес: кешіріңіздер,мен білген жоқпын,қазір жіберемін.
Жүгіріп шығып кетеді.Әуен ойналып,жеңіл қанатын қағып, көбелек ұшып кіреді.
Көбелек: үлкен рахмет сендерге балалар,құтқардыңдар,шыны ыдыстың ішінде ауа жоқ,әлсіреп қалдым,кішкене демімді алайын!
Тәрбиеші: көбелектің бойына қуат бітіріп,көңілін көтеру үшін өзі туралы тақпақ айтып берейік!

Әлімхан:
Қызыл қанат көбелек,
Жасыл қанат көбелек.
Гүлден-гүлге қонасың,
Ұстатпайсың не керек.
Карим:
Мен тимеймін,жасқанба,
Дос болайық,көбелек.
Жайнап тұрған бақшамда,
Гүлдерімді көре кет!
Көбелек: рахмет,балалар,мені қуанттыңдар,мен сендерді өзімнің гүл бағыма қонаққа шақырамын.Жүріңдер,мен сияқты қанаттарыңды қағыңдар!
Көбелектің артынан «қанаттарын қағып» гүл бақшаға жетеді.
Тәрбиеші: керемет!Көбелектің гүл бағы көздің жауын аларлықтай әдемі екен!Ал,иісі қандай,жұпар аңқиды,қане, иіскеп көрейікші!
Тыныс алу жаттығуы: «Жұпар иіс»
Көбелек: балалар,менің бір байқағаным,сендерде осы гүлдерден аумайсыңдар,сүйкімді,әдемісіңдер!
Тәрбиеші: иә,көбелек,біздің қыздарымыз-әдемі әрі өнерлі ән де шырқай алады,мың бұрала би де билейді.
Ән: «Біз өмірдің гүліміз»
Тәрбиеші: гүлдер қандай сан алуан түсті!Балалар тақпақ арнайықшы осы гүлдерге.
Аиша:
Гүлдер,гүлдер,көп гүлдер,
Қызыл гүлдер,көк гүлдер.
Жайнар кезім келді,-деп,
Қанаттарың желбіреп,
Таңмен бірге оянып,
Күн нұрына боянып,
Көрік бердің далаға!
Гүлдер,гүлдер не түрлі,
Құлпырды да, жетілді.
Аружан:
Біз доспыз гүлдермен,
Текке оны жұлмаймыз.
Той күні бір-бірден,
Анаға сыйлаймыз.
Көбелек: жарайсыңдар,ал,сендер білесіңдер ме?Гүлдерді не үшін өсіреді?
Балалар: әдемілік үшін,аралар бал жинау үшін,сіздей әдемі көбелектер қону үшін.
Көбелек: ал,гүлдер әдемі өсу үшін не істеу керек?
Балалар: су құю керек.
Тәрбиеші: ал,су құйып,күтіп-баптаған гүлдер әдемі болып өседі,біздің қыздарымыз әдемі гүлдерді аналарына ұқсатады,өздерің көріңдер.
Би: «Гүлдер»( «Менің анам ең әдемі» әніне билейді.)

Көбелек: жарайсыңдар,енді мен сендермен өзімнің сүйікті ойынымды ойнағым келіп тұр.
Қ/о: «Көпіршікті ұстап ал»
Тәрбиеші: балалар,енді біз өзіміздің сүйікті балабақшамызға қайтуымыз керек.
Көбелек: балалар,сендер- сондай мейірімді,ақылды,өнерлі,шапшаң,көңілді бір сөзбен айтқанда жан-жақты екенсіңдер,маған жиі қонаққа келіп тұрыңдаршы өтінемін!Мынау сендерге кішкентай сыйлығым,сау болыңдар,достарым!
Балалар: сау бол,әдемі көбелек!
Балалар көбелектерше «қанаттарын қағып» балабақшаға оралады.

«Күншуақ» естиярлар тобында өткізілетін тақырыптық мереке сценариі

Тақырыбы: «Көбелектің гүл бағында!»

Дайындаған тәрбиеші: Қартбаева.Ж.Б.

2017ж.

ЖТДО «Рауан»

«Күншуақ» естиярлар тобында өткізілетін тақырыптық мереке сценариі

Тақырыбы: «Көбелектің гүл бағында!»

Дайындаған тәрбиеші: Қартбаева.Ж.Б.

2013-2014 о.ж.