Менің отбасым
Солтүстік Қазақстан облысының Петропавл қаласындағы «Арман» бөбекжай-бақшасында ұйымдастырылған оқу іс-әрекеті балалардың «Менің отбасым» тақырыбын терең түсінуіне ықпал етеді. Тәрбиеші Қожахметова Айгүл Нұрмашқызы балаларға отбасы ұғымын, оның мәнін айтып, отбасы мүшелерін дұрыс атауға үйретеді. Бұл оқу іс-әрекеті негізінен балалардың сөйлеу дағдыларын дамытуға, олардың сөздік қорын молайтуға бағытталған.
Оқу барысында балалар отбасы мүшелерімен танысып, ата, әже, әке, ана, аға, апа, іні, қарындас сияқты сөздерді пайдаланып, өз отбасылары туралы айтып береді. Тәрбиеші бұл тақырыпта балалармен тілдесіп, олардың ойларын ынталандырады. Бұдан бөлек, «Шалқан» ертегісі арқылы отбасы құндылықтары мен ынтымақтастық туралы әңгімелеп, балалардың түрлі эмоцияларын оятады.
Сабақ барысындағы сергіту сәттері мен ойындар балалардың қызығушылығын арттыра түседі. Тәрбиеші, дайындаған көрнекі құралдар мен суреттер арқылы, балалардың назарын аударып, топтасып жұмыс жасауды ынталандырады. Оқу іс-әрекетінің мақсаты - балалардың отбасына деген сүйіспеншілігін арттыру, үлкендерді құрметтеп, кішіге қамқор болуға тәрбиелеу.
Тәрбиешінің түсіндіру тәсілдері балалардың оқу процесіне белсенді қатысуына мүмкіндік беріп, әрбір сабақтың нәтижелі өтуіне әсер етеді. Оқу іс-әрекеті соңында балалар өздерінің отбасылық дәстүрлері мен құндылықтарын қорытындылап, бақытты отбасы болудың негіздерін түсінеді. Осылайша, «Менің отбасым» тақырыбы балалардың қоғамдық өмірмен байланысын нығайтуға, оларға отбасы мен жанұяның маңыздылығын түсінуге көмектеседі.
Солтүстік Қазақстан облысы
Петропавл қаласы
«Арман» бөбекжай-бақшасы»
Тәрбиеші: Қожахметова Айгүл Нұрмашқызы
Бірінші сәбилер тобы
Ұйымдастырылған оқу іс-әрекеті
Білім беру саласы: «Қатынас», «Таным», «Әлеумет»
Оқу іс-әрекеті: Сөйлеуді дамыту.
Тақырыбы: «Менің отбасым»
Мақсаты: Балаларды отбасы сөзімен таныстыру, отбасы туралы түсінік беру. Отбасы құрамында кімдер болатынын және оларды дұрыс айтуға үйрету. Сөздік қорларын, ойларын, тілдерін, жүйелі сөйлеу дағдыларын дамыту. Балалардың отбасына деген сүйіспеншілігін арттырып, үлкендерін сыйлап, кішілерге қамқор болуға тәрбиелеу.
Әдіс-тәсілдері: Түсіндіру, көрсету, сұрақ-жауап, әңгімелесу, ертегі.
Көрнекі-құралдары: Отбасы мүшелерінің суреттері, «Шалқан» ертегі бойынша суреттер т.б.
Сөздік жұмыс: қарындас, сіңлі, іні, әпке, апа
Билингвальдық компонент: отбасы – семья
Ұйымдастыру кезеңі:
Шаттық шеңбері:
Үлкенге де сіз,
Кішіге де сіз,
Ата - ананы құрметтеп,
Бас иеміз біз.
Балалар шеңбер бойына тұрып, қимылдарды жасайды.
Айтылған сөздерді қайталайды.
Суреттермен жұмыс.
Тәрбиеші:
-Біз бүгін отбасы туралы әңгімелейміз. Отбасы дегеніміз бір үйде тұратын бізге ең жақын адамдар.
Отбасы мүшелері: ата, әже, әке, ана, аға, апа, іні, қарындас.
- Балалар, өз отбасыларыңыз туралы айтып берсеңіздер.
Балалар отбасы суреттері бойынша әңгіме құрайды:
-Мынау менің атам,
-Мынау менің әжем,
-Мынау менің әкем,
-Мынау менің анам,
-Мынау мен өзім Аиша!
Ғажайып сәт:
Тәрбиеші:
-Балалар қараңдаршы мен сендерге не алып келдім.
Балалар қызығушылық білдіреді.
Тәрбиеші сиқырлы дорбаның ішін ашады, «Шалқан» ертегі кейіпкерлер бейнеленген суреттер екен.
-Бүл кандай ертегі бейнеленген суреттер?
Балалар:
-«Шалқан» ертегісі!
Тәрбиеші:
-Дұрыс айтасыңдар, ертегіні есімізге алайық.
Ертегі суреттерін көрсете отырып балалармен бірге мазмүнын ашу.
«Шалқан» ертегісі.
Тәрбиеші:
-Ерте , ерте , ертеде ешкі жүні бөрте де. Баяғы бір заманда шал мен кемпір болыпты. Олардың бақшасы бар екен.
-Бақшаға шал не егеді?
Балалар:
-Шалқан егеді!
Тәрбиеші:
-Шалқан үп-үлкен боп өседі. Бір күні шал шалқанды жерден суырып алмақшы болады. Ары тартады, бері тартады. Бірақ шалқанды шығара алмайды.
- Шал көмекке кімді шақырады?
Балалар:
-Кемпірді!
Тәрбиеші:
- Кемпір шалдан, шал шалқаннан ұстап, ары тартады, бері тартады. Бірақ орнынан қозғалта да алмайды.
-Кемпір көмекке кімді шақырады?
Балалар:
-Немере қызды!
Тәрбиеші:
-Немересі кемпірден, кемпір шалдан, шал шалқаннан ұстап, ары тартады, бері тартады. Тағы да суырып шығара алмайды.
-Немере қызы кімді шақырады?
Балалар:
-Итін шақырады!
Тәрбиеші:
-Ит қыздың етегінен, немересі кемпірден, кемпір шалдан, шал шалқаннан ұстап, ары тартады, бері тартады. Шалқанды суыра алмайды.
-Енді ит көмекке кімді шақырады?
Балалар:
-Мысықты шақырды!
Тәрбиеші:
-Мысық иттің құйрығынан, ит қыздың етегінен, немересі кемпірден, кемпір шалдан, шал шалқаннан ұстап, ары жұлқиды, бері жұлқиды. Шалқан шықпайды.
-Мысық болса, кімді шақырады?
Балалар:
-Тышқанды шақырды!
Тәрбиеші:
-Тышқан келіп мысықтың құйрығынан, мысық иттен, ит немересінің етегінен, қыз кемпірден, кемпір шалдан, шал шалқаннан ұстайды. Олар тарта-тарта ақыры шалқанды суырып шығарады.
-Балалар қараңдаршы бұл ертегіде ата-әже, немересі және үй жануарлары бар екен. Олар бәрі бірігіп үлкен тату отбасында өмір сүреді екен.Ертегіде гі отбасы мүшелерін тағы қайталайық:
Балалар:
- Ата, әже, немере қыз, ит, мысық, тышқан.
Сергіту сәті: (саусақ гимнастикасы: балалар саусақтарын жұдырықтарына түйеді)
Бір үйде біз нешеуміз?
Кел, ойнайық екеуміз:
Бас бармағым - папам,
Балаң үйрек - апам,
Ортан терек - ағам,
Шылдыр шүмек - мен,
Титтей бөбек - сен.
Бір үйде біз нешеуміз?
Бір үйде біз бесеуміз! (балалар жұдырықтарын ашып, жұмады)
Қортынды:
Тәрбиеші:
- Балалар, біз отбасыларымызды сүйіп, олардың әрқайсысын құрметтеуіміз керек. Өйткені, отбасы – әрқашан қымбатты. Біз аға-апаларымызды тыңдап, іні-қарындас, сіңлілерімізге қамқор болуымыз керек. Отбасының болуы – үлкен бақыт. Барлығымыз бірге қайталайық.
Тақпақ:
Отбасы – ол бақыт,
Отбасы – ол ата-ана,
Отбасы – туыстарымыз,
Отбасы – ол шаңырақ.
