Балабақшаішілік семинар «Жануарлар досымыз»

«Бөбек бөбекжайы» МКҚК

сайыс
«Жануарлар досымыз»
Балабақшаішілік семинар

Тәрбиеші: Мухамедова. А

2015-2016ж

Мақсаты: Балалардың тез ойлау қабілеттерін дамыту. Балаларға сұрақтар арқылы логикалық ойлау қабілеттерін дамытумен қатар, еркін сөйлеуге дағдыландыру. Әдіс-тәсілдері: Сұрақ-жауап. Ұйымдастыру бөлімі: Амандасу Сәлеметсіздер ме, балалар және қонақтар. Балалар білесіңдерме біздің туған жеріміз Маңғыстау облысы Бейнеу ауданы деп аталады. Туған жер бұл адам өмірінде киелі орын алады екен. Міне сондықтанда тіпті балалық шақтан бастап, туған өлкемізді , ондағы өмір сүріп жатқан жан-жануарларды қастерлеп, оларға жақсы күтіммен қарап, қамқор болу керек. Балалар, қараңдаршы, Біздің туған өлкемізде мынадай жануарлар өмір сүреді екен. ( слайдтан жануарлардың суреттері көрсетіледі) Енді осы жануарларымызды біз балабақшамызға сайысқа қатысуға шақырған едік. Қане, сайыскерлерімізді ортаға шақырайық.(Әр түрлі жануарлардың киімін киген балалар музыка әуенімен ортаға шығады)
Өзінше ноян, Қорқақ ... кім? (қоян) Ендеше қоянды ортаға шақырайық (секіріп қоян келеді)
Түлкі деген қу неткен, Жүрген жерін шу еткен, Түздің жылпос бұл аңы , Артында көп ылаңы. деп ортаға түлкіні шақырайық.(бұлаңдап түлкі келеді)
Қасқыр жортар түнменен Күндес болып күнменен Қасқыр жортар сайменен Араз болып айменен Қасқыр жортар ойменен «Жолықсам» деп қойменен деп қасқырды шақырайық (қасқыр келеді)
Маңғыстау өлкесінде, таулы аймақтарда мекендейтін өте киелі жануарлардыі бірі киікті ортаға шақырайық (ортаға киік келеді)
Кішкене ғана бойы бар, Айналдырып киген тоны бар. (Қой) Ендеше қойды ортаға шақырайық (маң-маң басып қой келеді)
Қамыс құлақ, тостаған тұяқ. Мінсең қанат, сүті дәрі, еті тамақ. (жылқы) Ортаға жылқыны шақырайық. (шауып жылқы келеді)
Томпаң, томпаң торпағым, Шошаладан қорқағым, Сүзісуге батырым, Жарысуға шорқағым, Төрлете ғой бұзауым. Ортаға бұзау келеді
Жар басында жүреді, Тау басына шығады, Шапқылайды үнемі, Ақ ешкінің лағы. Алды артына қарамай Кезеді көп жағалай Оның барлық мінезі, Ойын құмар баладай Ортаға лақты шақырайық (секіріп лақ келеді) Қане, олай болса алдымен өзіміз жайлы білетін тақпақтарымыз тар ма? Жануарлар: Ия, бар.
Түлкі: Дана Мен түлкімін, түлкімін Тұнып тұрған күлкімін Бір күнім босқа өтпейді, Менен асқан қулық жоқ.
Қасқыр: Мадина Сұрғылт тартқан түсі бар, Ақсиған көп тісі бар, Тыным таппай жүреді Сілекейі шұбырып, Қыстау маңын ториды. Жемтігін іздеп сабылып.
Киік: Шапағат Арқаның бетпақ деген даласы бар, Бетпақ шөл ойлы қырлы панасы бар, Сол жерде ел жоқ, көл жоқ өсіп өнген, Жәндіктің киік деген баласы бар.
Қоян: Ақбота Ақ қоян-ау, ақ қоян. Үркек қоян, сақ қоян. Қаша берсең қалыңға Қорқағым деп ат қоям.
Лақ: Ақмоншақ Мынау тұрған лақ, Салпаңдаған құлақ Су ішетін жерім Сылдыраған бұлақ
Қой: Н. Дана Қой баласы қоңырмын, Қойдан жуас момынмын, Шопан ата түлегім, Қошақаным қайдасың
Сиыр: Дилара Мінезім жайлы сиырмын, Байлығымын бір үйдің, Етім дәмді, ссүтім бал, Сырымды менің ұғып ал.
Жылқы: Рахман Арғымақ тұлпар жылқымын, Мақтанымын жұртымның Ерге қанат тұлпар мен Қай түлік келер маған тең
Жарайсыңдар, олай болса үй жануарлары және жабайы жануарлары болып екі топқа бөлініп сайысымызды бастайық. Алдымен ережелерімен таныстырайын. Сайыс 5 тапсырмадан тұрады. Бұл жерде сендердің жылдамдықтарың байқалады. Тапсырмаларды орындау үшін айналғыш құралды айналдырамын, Қай жануардың ұяшығына тоқтаса сол жануардың тапсырмасын орындаймыз. Әр сұраққа қай топ бұрын жауап берсе, сол топқа мен бір жұлдызшадан беріп отырамын.
Ал, ендеше айналғышты айналдырдым, қоянның ұяшығына келіп тоқтады. Қоянның тапсырмасы: Бейне сұрақ «ойлан тап» деп аталады. Мен сендерге ойынның ережесін түсіндіріп өтейін. Сендерге интерактивті тақтадан Кішкентай бүлдіршіндер бір зат атаулысын суреттеп, сипаттап береді. Сендер оның қандай зат екенін табуларың керек. Ойынның шарты түсінікті ме?
1-ші бейне сұрақ: Ол бәріміздің үйімізде бар. Ол төртбұрышты. Түсі қара. Оның басқаратын тетігі бар. Біз одан көптеген бағдарламалар, мультфилмдер кинолар қараймыз. (теледидар)
2-ші бейне сұрақ. Ол қазір көптеген үйлерде бар. Ол төртбұрышты. Теледидарға ұқсас. Біз одан көптеген мәләметтер аламыз. Ойын ойнаймыз. Ғаламторларға шығамыз. Оның тышқан деп аталатын құрылғысы бар. (комьпютер)
3-ші бейне сұрақ: Ол байланыс қызметі. Бәріміздің үйімізде бар. Ол шырылдаса көтереміз Онымен ағайындармен, достарымызбен сөйлесеміз. (телефон)
4-ші бейне сұрақ: Ол жүреді. Оны біздің папаларымыз жүргізеді Ол жанармай арқылы жүреді. Оның төрт дөңгелегі бар. Түстері әр түрлі. Бір жерге барсақ соған мініп барамыз. (машина)
Келесі тапсырманы орындау үшін айналғышты айналдырамын. Қасқырдың тапсырмасы: «жасырынған суретті тап» деп аталады. Ойынның шарты: Үлкен экраннан жасырынған сурет бейнеленген.Ненің суреті екенін табуларың керек.
Балалар жасырынған суреттерді табады.
Балалар, қай топ алда келе жатыр екен, жұлдызшаларымызды санап отырайық.
Келесі тиіннің тапсырмасы: «Айырмашылығын тап». Үлкен экраннан екі суреттің айырмашылығын табу.
Сергіту сәті: «Жануарлар биі» Ойынның шарты: әр жануар өз қимылдарын салып билеу керек.
(музыка әуенімен қимылдарын салып, билейді)
Келесі тапсырма: «Жануарлар бейнесін құрастыру» Ойынның шарты: Екі топқа екі сурет бөлшектерін беремін. Ұжыммен қай топтың балалары бұрын құрастырып болса, сол топқа жұлдызша беріледі. (балалар жануарлар бейнесін жылдамдықпен құрастырады)
Жарайсыңдар, балалар. Келесі тапсырмамыз кірпінің тапсырмасы: «Бұл қай ертегі?» деп аталады. Бұл біздің соңғы тапсырмамыз. Ойынның шартын түсіндірейін: Менің қолымда «алақай» атты диск бар, осы дискіні мини комьпютерге салып, ертегіден үзінді тыңдатамын, сендер оның қай ертегі екенін табасыңдар. Ойынның шартын түсіндіңдер ме?
1-ші «Бауырсақ» ертегісі
2-ші «Жеті лақ» ертегісі
3- ші «Қасқыр мен ешкі» ертегісі
Жарайсыңдар, балалар қандай тапқыр едіңдер. Бес бөлімде де өздеріңді жақсы көрсетіп шықтыңдар. Осымен біздің жануарлар сайысымыз өз мәресіне жетті. Жарыс болған соң жеңімпаз болу керек, Жұлдызшаларымызды санап жеңімпаз топты анықтайық.
Балаларды марапаттау, сыйлықтар тарату.