Әрқашан күн сөнбесін сценарий

Тақырыбы: «Әрқашан күн сөнбесін!»(асфальтқа сурет салу)
Мақсаты: Балалардың шығармашылық қабілетін ояту. Балалардың төл мерекесі, 1-маусым халықаралық балалардың құқығын қорғау күнін балаларға сезіндіру. Жазғы маусыммен таныстыру.Түрлі суреттерді бейнелеуді, түстерді таңдауды үйрету.Балалардың ой-өрісін, шығармашылық қабілетін арттыру.Балаларды сүйіспеншілікке тәрбиелеу.
Іс-шар барысы
Мереке балабақша алдында, даладағы гүл алаңында өтеді. Музыкалық таспада ән ойнап тұрады. Аула алуан түрлі шаралармен безендірілген. Балалардың қолдарында гүлдер, шарлар.
Құрметті де сүйікті балалар және қонақтар! «Қарлығаш» ортаңғы тобының «Әрқашан күн сөнбесін!» атты мерекелік іс-шарасына қош келдіңіздер!
Құшағында Нұр Отанның еркелеп,
Бақыттымыз біз балалар не керек?!
Алдымыздан қол бұлғайды армандар,
Болашақты болжаймыз біз келешек
Ел мейірін қандырған,
Біз бақытты балдырған!
Күлкімізден туған өлке,
Жайраң қағып жандырған!
(Буратино қонаққа келді).
Буратино:Сәлеметсіздер ме балалар! Сендер мені білесіздер ме? Гүлдей жайнаған балапандар, мерекелеріңіз құтты болсын! Мен сендердің бүгінгідей керемет мерекеде қандай өнерлерің бар екенін көргім келеді. Сендер мені қалай таң қалдыра аласыңдар?
Тәрбиеші: Қане балалар! Буратиноға біз өз өнерімізді көрсетейікші.
Ерке:
Жайқалып жапырақ,
Құлпырып қызғалдақ.
Тұратын көз тартып,
Жаз келер күн шуақ.
Нұрасыл:
Алақай-ай балалар,
Қандай жақсы жазғы ай.
Гүлге оранды кең дала,
Келді ауылға көп торғай.
Айару:
Алақай-ай ау, Алақай-ай,
Жарқыраған жаз келді.
Өлкемізге әр берді,
Айналамыз жап-жасыл,
Жазбен бірге ән келді.
Қайсар:
Жаз келіпті дегенше,
Алма пісті дегейсің,
Бағымызда ендеше,
Алма теру көбейсін.

Буратино: Ой балалар, сендердің өнерлерің қандай керемет. Әдемі тақпақтар біледі екенсіңдер. Қанекей балалар, тағы қандай өнерлерің бар? Енді сендердің қаншалықты сурет сала алатындарыңызды көргім келеді. Сендер сурет салу өнерін білесіңдер ме? Маған керемет сурет салып беріңдерші?
Тәрбиеші:  Қанекей, балалар «Әрқашан күн сөнбесін!» тақырыбына қатысты жерге түрлі-түсті борлармен әдемі де әсем қылып сурет салып көрейікші.
(Балалар бояу бормен асфальтқа сурет салады)
Тәрбиеші: Қане балалар, барлығымыз сурет салып болсақ ортаға жиналайық. Балалар, сендер қандай сурет салдыңдар? Қанекей, кім айтады?
Балалардың жауаптары: Бәйтерек, күн, бұлт, балалардың шар ұстағаны, үй т.б. суреттер.
Буратино: Балалар сендер өте өнерлі екенсіңдер! Тақпақты да керемет айттыңдар, суретті де керемет салады екенсіңдер! Сендерге көп рахмет! Өнерлерің өрге жүзсін! Сендердің өнерлеріңді марапаттағым келіп тұр.
Тәрбиеші: Қанекей балалар, буратиноға өнерімізді көрсетіп болсақ, ортамызға қошеметпен балабақша меңгерушісі Динара Түкенқызын шақырайық!
(Құттықтау)
Тәрбиеші: Осымен «Әрқашан күн сөнбесін» атты мерекелік іс - шарамыз аяқталды. Көріп тамашалағандарыңызға көп рахмет.

Тақырыбы: «Әрқашан күн сөнбесін!» (асфальтқа сурет салу)
Мақсаты:  балалардың жеке қасиеттерін дамыту, тақпақ, өлең, әндерді нақышына келтіре айтуды үйрету. Бір - бірін сыйлауға, адамгершілік қасиеттерін жоғалтпай ұстауға жетелеу.
Көрнекілігі: нақыл сөздер, түрлі - түсті шарлар,
Жүргізуші: Армысыңдар балалар, бармысыңдар,
Жаз да келді, жайнаған гүлді шыңдар
Алдыменен алайық амандасып,
Армысыңдар бәрің де, армысыңдар!
Жүргізуші: Сәлеметсіздер ме, мерекеге жиналған қонақтар,
ата - аналар, балалар!
Баршамызды бала тілмен баурайтын,
Бала деген бір бақыт қой самғайтын
Ата - ананың арманы мен тілегін,
Бала емес пе бал бұлақтан жалғайтын
Сүйкімді періштелер сендерсің
Қандай бейне өздеріңе тең келсін!
Данышпан да, ғарышкер де, ғалым да,
Ең алдымен балалықты меңгерсін.
Ән: «Қошақаным»
Сайқымазақтардың келуі
Сайқымазақ:Бұл не мереке? Нені тойлап жатырсыңдар? Бізге неге айтпадыңдар, а? Бізсіз ешқандай мереке болмайды?
Жүргізуші: Тоқта, тоқта, сендер кімсіңдер өзі біздің мерекені бұзатын? Бүгін үлкен мереке, біз оны тойлаймыз, ешкім кедергі бола алмайды! Бізбен бірге тойлаймыз десеңдер, онда тәртіп сақта!
Балалар, сайқымазақты қалдырамыз ба? Қалдырамыз.
Жүргізуші: Ақылды балапан бүгінгі,
Көркейтер күніңді ертеңгі,
Үйренген өнерін көрсетсін
Бүлдіршін балалар белсенді.
Ендігі кезекті бүлдіршіндерге берейік.
Айша:
Бала, бала, баламыз
Бақшамызға барамыз
Күні – бойы қызыққа
Батамыз да қаламыз.
Ануар:
Мен гүлдерді жұлмаймын
Торғайларды қумаймын
Айтқан сөзді тыңдаймын
Апашымды сыйлаймын
Нұрғали:
Көжегім тұршы
Бетіңді жушы,
Айнаға қарашы,
Шашыңды тарашы.
Алинұр:
Біздерде бар қуыршақ
Бұзау, қозы, құлыншақ
Ойыншықтар тыңдайды
Емес олар ұрыншақ
Назерке:
Алма сыйлап бөбекке
Алма ағаштар сарғайған
Төгілген тер шелектеп
Көрінеді маңдайдан.
Жүргізуші: Иә, рас, бала болған бәрі де,
Салған олар балалықтың әнін де.
Бала кезін еске алып отырсақ,
Сол емес пе тіршіліктің мәні де! - дей келе құрметті ата – аналар балалық шағымызды еске ала отырып, сайқымазақтардың бізге ала келген ойынын ойнайық.
Ойын: «Кім жылдам» Шарты: Ата-аналар өз баласына бір әріптен еркелету айтып бірінші жету керек.
Жүргізуші: Көк жиектен күлімдеп,
Маусымның таңы атты
Тұра қойшы күнім – деп,
Анаң сені оятты –
Даналардың тілегі,
Балалардың тілегі
Ауырмасын ешқашан
Аналардың жүрегі
Би: «Ха-фа-на»
Сайқымазақ: Жарайсыңдар, балалар сендер өте жақсы өнер көрсеттіңдер,менің сендерге әкелген сыйлығым бар, міне қабыл алыңдар.Осы ойыншықтармен шағын орталықта тату-тәтті бірге ойнасын деп,сендерге алып келдім!
Жүргізуші: Рахмет саған сайқымазақ! Осымен «Әрқашан күн сөнбесін» атты мерекелік іс - шарамыз аяқталды.Көріп тамашалағандарыңызға көп рахмет