Ұсақ қол моторикасын дамыту: М.Монтессори әдісі

№2 "Ақ сұңқар" бөбекжай-балабақшасы

М.Монтессори әдісі бойынша
ұсақ қол моторикасын дамытуға арналған жаттығулар мен ойындар жиынтығы.

Дайындаған: тәрбиеші Кисапова
Жеңісгүл Амангелдіқызы

Атырау 2017 жыл

1. Үйшік

Егістікте үйшік тұр, (саусақтарының бастарын түйістіріп, үйшік жасайды)
Оған барар жол жабық (қолдарын айқастырып, жолды жабады)
Айқара ашып қақпаны (қақпаны ашады)
Шақырамыз қонақты (қолдарын бұлғап шақырады).

1. Үй тұрғызу

Балғаменен ұрып, ұрып (жұдырықты түйіп, үстелді ұрады)
Мол ғып шеге қағамын (жұдырықтарын кезекпен бірінің үстіне бірін қояды)
Әдемі ғып үй тұрғызып (қолмен үйшік жасайды)
Бәрін бірге жиямын (саусақтарын барына ашып, қайтадан жұмады)

1. Бір үйде біз нешеуміз?

Бір үйде біз нешеуміз?
Кел санайық, екеуміз.
Бас бармағым - папам,(аталған саусақтарын жазады)
Балаң үйрек - анам.
Ортан терек - ағам
Шылдыр шүмек - мен
Титтей бөбек - сен.
Бір үйде біз нешеуміз?
Бір үйде біз бесеуміз.(саусақтарын ашып, жұмады)

1. Саусағымызмыз қайда екен?

Саусағымыз қайда екен? (саусақтарын көрсетеді)
Саусағымыз қайда екен?
Саусағымыз жоқ па екен? (саусақтарын жұдырыққа жасырады)
Саусағымыз міне екен. (саусақтарын көрсетеді)
Саусағымыз билейді, жүгіреді, жүйткиді (аталған әрекеттерді жасайды)

1. Саусақты демалту

Саусағымыз шаршады, (қолдарын үстел үстіне қояды)
Демалуды қалады.(ары бері қозғайды)
Саусақтарды жазайық, (қолдарын көтеріп, саусақтарын жазады)
Бір, екі, үш, демалтып бір алайық.( саусақтарын жазып, қайтадан жұмады)

1. Бас бармағым қайдасың?

Бас бармағым қайда болдың? (екі қолдың бас бармақтарын көрсетеді)
Мына ағаммен тауға бардым, (саусақтарын кезекпен бас бармаққа қосады)
Мына ағаммен отын жардым
Мына ағаммен ән салып,
Ал ініммен тойға бардым.

1. Серуен

Бір, екі, үш, төрт, бес (бас бармақтан бастап санайды)
Серуенге шықты саусақтар (үстел үстінде саусақтармен жүреді)
Бір, екі, үш, төрт, бес (шынашақтан бастап санайды)
Үйге қайта тығылды (жұмырықтарын түйеді).

1. Салат

Сәбізді алып тазалаймыз (оң қолды жұдырыққа түйіп, сол қолдың алақанына ысқылайды)
Үккішпен үгіп майдалаймыз (екі қолды жұдырыққа түйіп кеудеге ұстап, жоғары-төмен қозғайды)
Қантты сеуіп дәмдейміз (саусақтардың ұшымен қант себеді)
Қаймақ құйып сәндейміз (қолды жұдырыққа түйген күйі қаймақ құйған сияқты) қол білегін жоғары-төмен қозғайды)
Міне, дайын нәр тағам- (екі қолын алдына жайып көрсетеді)
Дәруменге байыған (алақанымен іштерін сипалап, тойғандықтарын білдіреді.

1. Бақшада

Күректерді алайық, (екі қолмен күрек алғандай қимылдайды)
Жерді қазып, дайындап, (қолменен жер қазады)
Тыңайтқышты шашайық. (саусақ ұштарымен себеді)
Тырнауышты алайық, (саусақтарын жартылай бүгіп, араларын ашады)
Бақшаға жер дайындап, (үстел үстін тырмалайды)
Дәнді сеуіп тастайық. (саусақ ұштарымен себеді)
Шелекпен су құяйық,(жұдырықтарын түйіп, су құйғандай білезіктерін қимылдатады)
Арамшөбін жұлайық, (саусақтарын жинап, шөп жұлады)
Күн астында бақшамыз,(алақандарын жаяды)
Жылдамдатып өссін деп,
Қарап, қарап қояйық. (қолдарын қабақтарына апарып, айналаны қарайды)

1. Компот

Жемістерді жинаймыз, (қолдарымен жемістерді жинайды)
Алманы ірі тураймыз, (қолдарының қырымен турайды)
Алмұртты алып ұсақтап,
Алхораны жуамыз. (жуғандай әрекет етеді)
Лимонды алып сығамыз, (жұдырық түйіп, сығады)
Қантын мол қып қосармыз.(саусақ ұштарымен қант себеді)
Суын құйып қайнатып,
Қонақтарға тосамыз.(алақандарын жайып, ұсынады

1. Орамжапырақ

Орамжапырақты аламыз (саусақтарын сәл бүгіп, беттестіреді)
Пышақпенен тураймыз (қолдың қырымен турайды)
Оны қатты қысып ап, (қолдарын сәл бүгіп, қысады)
Дәміне қарай тұздаймыз.(тұз себеді)
Суын әбден сығамыз (жұдырықта ашып, жұмады)

1. Тасбақа

Асықпайтын тасбақа (жұдырықты үстел үстімен жайлап жылжытады)
Тас ішінде тұрады
Басын жайлап шығарып, (сұқ саусағын шығарып, қайтадан жасырады)
Қайтадан оны тығады. (бірнеше рет қайталайды)

13. Қайық
Алақанды беттестіріп, (сөздерге сай қимылдайды)
Әдемі қайық жасадым.
Алақанды қайығым
Жүйткиді алға қарай.

14. Найзағай
Жерге түскен тамшыдан (әр қолдың екі саусағымен жаңбыр жауғызады)
Өрмекші қатты қорықты (саусақтарын сәл бүгіп, өрмекші секілді қозғалтады)
Нөсерлеткен жаңбырдан (жаңбырды қаттырақ жауғызады)
Торғайлар келіп тығылды (саусақтарын жазып, екі қолын айқастыра, қанат қағады)
Шелектеп құйған жаңбырдан (барлық саусақтарымен қаттырақ жаңбыр жауғызады)
Балалар үйге жүгірді (ортаң,ы және сұқ саусақпен жүгіреді)
Найзағай қатты жарқырап (ауада найзағайды бейнелейді)
Күркілдеді көк аспан (жұдырықпен үстелді тырсылдатып, алақандарын соғады)
Кенет бұлтты ысырып (қолдарымен жан жаққа сырады)
Шықты күн де жайнаған («күн» жасайды).

15.Жаңбыр
Таң атқаннан тоқтамастан
Жаңбыр жауды себелеп (барлық саусақтарымен жайлап «жаңбыр жауғызады»)
Сондықтан да жасыл желек (саусақтарын түрлі бағытта қозғайды)
Суға қанды, не керек? (саусақтарын жазып, алақандарын жаяды)

16. Қонақта
Әдемі мына үйшікте (үйшік жасайды)
Құйтақандар тұрады.
Қонаққа бірге барайық (саусақтарымен жүреді)
Есікте жайлап қағайық (үстелді қағады)
Құйтақанның үйінде
Ағаш еден төселген (алақандарын үстелге қояды)
Биік орындық қасында (сол қолды вертикаль бағытында қойып, оны оң қолдың жұдырығымен беттестіру)
Емен үстел үстінде (сол қолмен жұдырық жасап үстелге қойып, оң қолдың алақанымен жабады)
Тастабақ пен шанышқы (оң алақанды сәл бүгіп, сол қолмен шанышқы жасайды)
Үсті толы тамақты
Жемеуге енді бола ма?

17.Гүл
Әдемі қызыл гүлімнің
Жапырағы ашылды.(алақандарымен ашылған гүл жасайды)
Жел кеп оны тербетіп, (қолдарын тербетеді)
Жапырағын жабады. (жапырақтарын жабады)
Ұйқыға кетер майжырап,
Жапырағын шайқалтып.(гүлдің басын шайқайды).

Ойын:“Мұнара тұрғызайық”
Жасы:1,5-2,5 жас аралығы
Қажетті заттар: кубиктер
Ойын барысы: балаға кубиктерден мұнара тұрғызу ұсынылады. Соңғы кубикті орналастырғаны жеңілген болып есептелінеді.

Ойын:“Ұяшықтарға сал”
Жасы:1,5-2,5 жас аралығы
Қажетті заттар: ұяшықтары бар конфет қорабы мен екі түсті өте ірі ілгектер не моншақтар
Ойын барысы: алдымен өзіміз ілгектерді ұяшықтарға
салып көрсетеміз. Бала ұяшықтарға салып үйренген соң, түстеріне сәйкес орналастыруға дағдыландырамыз (алдымен өзіміз үлгі береміз).

Ойын:“Ермексаздан жасалған шелпектер”
Жасы:1,5-3 жас аралығы
Қажетті заттар: ермексаз, ойыншық балға
Ойын барысы: ермексаздан бірнеше дөңгелектер жасап алып, балаға оны балғаның көмегімен ұру арқылы шелпек жасауды ұсынамыз. Ойын қызығырақ болу үшін қанқыз не дақтары бар бейнені жасап алып, балаға дақтарын жасау ұсынылады.

Ойын:“Әдемі түтікше”
Мақсаты:қолдың ұсақ моторикасын дамытуға арналған
Жасы:2-3,5 жас аралығы
Қажетті заттар: диаметрі 0,7-1см болатын түтікше, ұсақ фосоль не моншақтар.
Ойын барысы: түтікше ретінде қаламсаптың қораптарын алуға болады, ең бастысы оның мөлдір және қақпағы болғаны дұрыс. Алдымен қақпағын ашып, ішін моншақтармен не ұсақ фасольмен толтыру ұсынылады. Сосын түтіктің қақпағы жабылады. Өз қолымен жасалған түтік-сылдырмақ балаға сөзсіз ұнайды.

Ойын:“Торды баумен безендіреміз”
Жасы:2-4 жас аралығы
Қажетті заттар: түрлі түсті баулар және тор (баланың жасы ұлғайған сайын торлар ұсақ болу керек).
Ойын барысы: балаға торкөздерге бау өткізу ұсынылады. Алдымен жай ғана өткізсе, кейін түрлі түсті баулар арқылы бейнелер не пішіндер жасауға болады.

Ойын:“Жіп орайық”
Жасы:2-3 жас аралығы
Қажетті заттар: тоқыма жіп, қатты қағаз 10*5см
Ойын барысы: балаға тоқыма жіпті орау ұсынылады. Алғашында қатты қағазға орап үйренген бала, кейін өзі де жіпті оңай орайтын болады.

Ойын:“Скрепкалар”
Жасы:2-4 жас аралығы
Қажетті заттар: скрепкалар, түрлі пішінде қиылған қатырма қағаздар.
Ойын барысы: Алдымен балаға қатырма қағазға бекітілген скрепкаларды алу ұсынылады. Кейін өзіне бекітуге мүмкіндік берген жөн. Екі не одан да көп түсті скрепкаларды пайдаланып, түс ажыратуларын да бекітуге болады.

Ойын:“Балық аулау”
Жасы:2,5-3,5 жас аралығы
Қажетті заттар: қорап, тесіктері бар ұсақ ойыншықтар, ұзын таяқша
Ойын барысы: үстел үстіне ұсақ ойыншықтар таяқпен іліп алуға ыңғайлы етіп орналастырылады. Таяқ арқылы балаға “балық аулау” ұсынылады. Ауланған балықтарды екінші қолдың көмегінсіз қорапқа салуы керек. Балалар көп болса “жақсы балықшы” жарысын ұйымдастыруға болады.

Ойын:“Тоқыма”
Жасы:2,5-4,5 жас аралығы
Қажетті заттар: екі түсті қатырма қағаз, қайшы, скотч
Ойын барысы: қатырма қағазға төртбұрышты салып алып, пішіннің ішін бірдей көлемде ұзынынан қиып шығамыз. Енді екінші түсті қағаздан жолақтар қиып алып, оларды бағытына қарай ұштарын скотчпен алғашқы қатырма қағазға бекітеміз. Балаға тоқыма тоқуды ұсынамыз.
Ойын:“Жүк тасушы”
Жасы:2,5-4 жас аралығы
Қажетті заттар: ойыншық жүк көлігі, ұзын бау не жіп, қарындаш, кубиктер
Ойын барысы: жүк көлігіне кубиктерден мұнара жасау арқылы толтырып жүк тиейміз де, көлікке жіп бекітеміз. Жіптің келесі ұшына қарындаш бекітіледі. Бала жіпті қарындашқа орау арқылы, жүкті құлатпай иесіне жеткізуі керек. Бірнеше баламен сайыс өткізуге де болады. Жүкті құлатпай, алғашқы жеткізген жүргізуші жеңімпаз атанады.

Ойын:“Шаш өру”
Жасы:2,5-5 жас аралығы
Қажетті заттар: түрлі түсті ұзын баулар, не тоқыма жіптен арнайы шаш жасалған қыздың суреті.
Ойын барысы: Тоқыма жіптен жасалған шашпен не баулармен балаға шаш өру ұсынылады. Өріп болған соң арнайы баулармен бекітуге болады.

Ойын:“Құм себу”
Жасы:3-5 жас аралығы
Қажетті заттар: арнайы құрғаққұм не манна ұнтағы, ұсақ моншақтар, кішене шелек немесе шыны ыдыс
Ойын барысы: қолымызға құмды толтырып алып, кейіннен оны аз аздан үзбей төгеміз. Бірнеше рет жаттыққан соң арнайы ыдысқа салып қараймыз. Асфальт не тегіс тақтайға осы әдіс арқылы сурет салуға болады.
Әбден жаттыққан соң жаттығуды күрделендіреміз. Енді құмның орнына моншақтар аламыз.

Ойын:“Әдемі бейнелер”
Жасы:3 және одан ересек жас аралығы
Қажетті заттар: қатырма қағаз, ПВА желімі, қылқалам, мақта, түрлі түсті қағаз не мата, жіп қиындылары, гуашь бояуы
Ойын барысы: қағаз бетіне қажет бейнені салып аламыз, кішкентай жастағы балаларға пішін салу ұсынылады. Енді қылқалам көмегімен суретке желім жағылып, мақтаны аз аздан үзіп алып бекіту ұсынылады. Қажет жерлеріне мата не қағаз қиындылары жапсырылып, гуашьпен боялады. Бұл әдіс арқылы аққуды, балапанды, қоянды, аюды, т.б. бейнелеуге болады.

Ойын:“Жидектерді жинайық”
Жасы:2-4 жас аралығы
Қажетті заттар: 1-1,5м қатты жіп, скрепкалар, қызыл және көк түсті ермексаз, арқасы бар екі орындық, себет
Ойын барысы: қызыл ермексаздан шие, көк ермексаздан жидек жасап, скрепкаларға бекітеміз. Оларды екі орындықтың арқалығына бекітілген жіпке тағамыз да,
балаға жидек жинауды ұсынамыз. Ол скрепканы сол қолымен ұстап тұрып, оң қолының үш саусағымен жидектерді ыдыстарға салуы керек.

Ойын:“Жол төсейік”
Жасы:2-3 жас аралығы
Қажетті заттар:құм немесе манна ұнтағы, екі ойыншық
Ойын барысы: Екі ойыншықтың аралығын ашып қояды не болмаса текшелерден үй жасауға болады. Енді балаға осы екі аралыққа жол салу ұсынылады. Міндетті түрде құмды үздіксіз. Ұш саусақтың көмегімен себуі керек.

Ойын:“Саңырауқұлақ жинайық”
Жасы:2-5 жас аралығы
Қажетті заттар: боялған және ұсақталып қиылған паралондар, себет
Ойын барысы: балаға жерге шашылған ұсақ паралондарды “саңырауқұлақ” ретінде жинау ұсынылады. Ол әр паралонды жеке жеке жинап алып, себетке бір бірден салуы керек. Бұл ойын сонымен қатар ұқыптылық пен тазалыққа үйретеді.

Ойын:“Ретімен орналастыр”
Жасы:2-5 жас аралығы
Қажетті заттар: екі не одан да көп түсті моншақтар, бос ыдыстар
Ойын барысы: “Қарашы, қуыршақтың моншақтары араласып кетіпті, біз оған оларды реттеуге көмектесейік, түстеріне қарай жинайық” деген сияқты мысалдар айтып, балаға моншақтарды түстеріне қарай ажыратып, реттеу ұсынылады. Ойынды міндетті түрде аяғына дейін жеткізу керек.

Ойын:“Моншақтарды жинайық”
Жасы:2-5 жас аралығы
Қажетті заттар: құм салынған ыдыс, ұсақ тастар не моншақтар, сүзгі, бос ыдыс
Ойын барысы: балаға құм арасынан тастарды не моншақтарды іздеп тауып, ыдысқа салу ұсынылады.
Осы әрекетті орындап болғасын сүзгінің көмегімен құмды илеу арқылы моншақтарды табу ұсынылады.

Ойын:“Күрішті тазалайық”
Жасы:2-5 жас аралығы
Қажетті заттар: күріш, манна ұнтағы, илек, ыдыстар
Ойын барысы: Балаға илек арқылы араласып кеткен күріш дәндері мен манна ұнтағын ажырату ұсынылады. Сүзгімен илеп ажыратылғаны көрсетілгеннен кейін күріш пен манна ұнтағының қалай араластырылғаны көрсетіледі.

Ойын:“Судан сүзіп ал”
Жасы:2-5 жас аралығы
Қажетті заттар: су құйылған ыдыс, сүзгі, батпай жүзетін ұсақ заттар, бос ыдыс
Ойын барысы: су құйылған ыдысқа ұсақ заттарды саламыз. Енді сүзгінің көмегімен бала оларды судан сүзіп алып, ыдыстың оң жағында тұрған бос ыдысқа салуы керек.

Ойын:“Дәрі дайындайық”
Жасы:2-4 жас аралығы
Қажетті заттар: су, бояу, қасық, шыны ыдыс
Ойын барысы: “Қарашы, қуыршағымыз ауырып қалыпты, оны емдейтін дәрі жасайық. Ол ұшін мына дәріні суға араластырып, қуыршағыңа бере ғой.” деп балаға дәрі жасау ұсынылады. Ол үшін бояуды таза суға араластырамыз. Бала шыны ыдыстың жиектеріне қасықты тигізбей араластырулары керек.

Ойын:“Шашпа, төкпе”
Жасы:2-4 жас аралығы
Қажетті заттар: құмыра, дәндер не ұнтақтар, су, ыдыс
Ойын барысы: алдымен құмыраға дақылды салып, оны оң қолмен ұстап, сол қолмен демеп бос ыдысқа құйып көрсетеміз. Егер бала құмырадан шашпай бос ыдысқа аударса, оны мадақтау керек. Дақылды аударып дағдыланған соң ұнтақпен, содан кейін сумен жұмыстанамыз

Ойын:“Крем араластыру”
Жасы:2-3 жас аралығы
Қажетті заттар: ыдыстағы су, сусабын, шанышқы не қасық
Ойын барысы: Ыдыстағы суға бірнеше тамшы сусабын тамызып, балаға араластыру ұсынылады. Міндетті түрде сағат тілі бағытымен араластыруы керек. Су шашыраған жағдайда сулықпен сүрткізіп үйрету керек.

Ойын:“Аш та, жап ”
Жасы:2-5 жас аралығы
Қажетті заттар: қақпақтары жабылған түрлі көлемдегі ыдыстар
Ойын барысы:балаға дүкенші (дәрігер, т.б.) болу ұсынылады. Ол әр түрлі көлемдегі ыдыстардың қақпағын ашуы керек. Баланың міндетті түрде қақпақты бұрап ашқанын қадағалау керек. Сонымен қатар ыдыстардың көлемдерін айтып өту керек.

Ойын:“Қасықпен сал”
Жасы:2-5 жас аралығы
Қажетті заттар: екі құрғақ кесе, манна ұнтағы не жарма, қасық
Ойын барысы: Екі құрғақ кесені алып, сол жағындағы кесеге жарма не манна ұнтағын саламыз. Ал оң жағындағы бос болуы керек. Сосын қасықпен жарманы алып бос кесеге саламыз. Енді балаға осы әрекетті қайталаймыз. Не болмаса балаға шайына қант салып араластыру ұсынылады. Ойын барысында жарманың қасықтан төгіліп қалмауын қадағалайды.

Ойын:“Ілгектеріңді сал”
Жасы:2-5 жас аралығы
Қажетті заттар: арнай дайындалған “салынбалы рамкалар” (ілгектермен, баулармен, сырғатпалармен, ілмектермен, қапсырмалармен, т.с.с.)
Ойын барысы: балаға арнайы дайындалған “салынбалы рамалар” беріледі. Ол өз бетімен ілгектерді не қапсырмаларды, т.с.с. салуы не бекітуі керек.Салу, бекіту дағдылары қалыптасқаннан кейін бауларды баулап үйретуге болады. Бұл ойын күнделікті өзіне қызмет ету дағдыларын қалыптастырады.
Ойын:“Күлбике”
Жасы:1,5-5 жас аралығы
Қажетті заттар: араласқан дәндер ( фасоль, бұршақ, күріш, қарақұмық, т.б.) немесе түрлі пішіндегі (түрлі түске боялған) макарон өнімдері, қажетіне қарай бос ыдыстар
Ойын барысы: араластырылған дәндер алынып, балаға оларды ыдыстарға ажыратып салу ұсынылады. Не болмаса түрлі пішінді макарон өнімдерін алуға болады. Оларды алдын ала түрлі түске бояса балаларға ойын қызығырақ болады. Әрі олардың түстерді ажырату қабілеттері дамиды.

Ойын:“Сиқырлы қапшық”
Жасы:3-5 жас аралығы
Қажетті заттар: балаға таныс 8-10 ойыншық не ұсақ заттар, әдемі қапшық
Ойын барысы: қапшыққа ойыншықтар не ұсақ заттар орналастырылып, ауызы жабылады. Бала көзін жауып, қапшықтан бір затты алады. Ол сипап сезу арқылы заттың атын атауы не оны сипаттап беруі керек. Ойынды бірнеше баламен сайыс түрінде де өткізуге болады. Көп затты
дәл тауып атаған бала жеңімпаз атанады.

Ойын:“Қатырма қағазда тігу”
Жасы:4 жас және одан жоғары
Қажетті заттар: көзі үлкен ине, қатырма қағаз, біз, жіп
Ойын барысы: қатырма қағазға сызықтар сызып не сурет саламыз. Оның инемен тігеді деген жерлерін белгілеп бізбен тесеміз. Енді балаға инені сабақтатып, салынған сызық бойымен тігу ұсынылады. Алғашында ол тіге алмайды. Сол кезде баланың қолын ұстап, бірге тігеміз. Бала тігіп дағдыланғаннан кейін өзіне тігуге мүмкіндік береміз. Ойын қызықты болуы үшін қатырма қағазды түрлі пішінде қиып алып, суретке сәйкес жіптің түсін таңдауға болады. Немесе моншақтармен әдемілеу де ұсынылады.

Ойын:“Мозайка құрастыру”
Жасы:2,5-5 жас аралығы
Қажетті заттар: мозайка
Ойын барысы: балаға мозайка және оның арнайы тақтайы беріледі. Ол мозайкалардан өзі қалаған бейнені жасап шығаруына болады. Алғашында гүл, үшбұрыш секілді оңай жасалатын бейнелерді құрастыруға дағдыландыру керек.

Ойын:“Моншақтарды тіз”
Жасы:2 жас және одан жоғары
Қажетті заттар: түрлі көлемдегі моншақтар не ілгектер, боялған макарон өнімдері.
Ойын барысы: балаға жасына сай таңдалған моншақтар не ілгектер, болмаса боялған макарон өнімдері мен баулар беріледі (алғашқыда ірілері, жіпке тізіп дағдыланған соң ұсақтары). Оған қуыршаққа не өзіне әдемі моншақтар тізу ұсынылады. Бастапқыда бауға тізу ұсынылса, кейін кәдімгі жіпке тіздіруге болады.
Ал ортаңғы және ересек топ балаларына түрлі түсті қағаздарды умаждау арқылы моншақтарды жасап, инемен тізу ұсынылады. Ойын барысында балалардың аузына салып алмауы, инемен мұқият жұмыс жасауы қадағаланады.

Ойын:“Қыстырғыштар”
Жасы:2 жас және одан жоғары
Қажетті заттар: түрлі түсті қыстырғыштар, қатты қағаздан не ПВХдан қиылған түрлі бейнелер, жіп, т.б.
Ойын барысы:
І нұсқа: балаға жасына сай қағаздан не ПВХдан қиылған бейнелер (кірпі, шырша, тарақ, күн, т.б.) беріліп, оның қажетті детальдарын қыстырғышпен толықтыру ұсынылады.
Ортаңғы топ және ересек топ балаларына алдын ала сызылған бейнені қиып алып, түрлі түсті қарындаштармен бояп, қыстырғышпен толықтыру ұсынылады.
ІІ нұсқа: балаларға қуыршақтың киімдерін, не өздерінің бет орамалдарын жуып, қыстырғыш көмегімен жіпке тізу ұсынылады.
Жалпы қыстырғыштармен түрлі ойындар ойлап табуға болады, мысалы, түстеріне қарай топтастырып, мұнара жасау, жол жасау, т.б. Ең бастысы ұшқыр қиял мен өз ісіңе деген сүйіспеншілік болса болғаны.

Әдебиеттер:
1.Г.Д.Абдрахимова Саусақ және тіл жаттығулары-дидактикалық материалдар/ «Арман –ПВ» баспасы, 2013
2. Развитие мелкой моторики рук (по методике М.Монтессори) - интернет материалдары
3.Весёлые пальчиковые игры- интернет материалдары